rikt shikshakon kee niyuktiyaan sheeghr pooree karane ke aashvaasan die jaate hain, par nateeja dhaak ke teen paat rahata hai jagamohan sinh raajapoot shiksha sudhaaron mein pahalee praathamikata shikshak prashikshan sansthaanon kee gunavatta bananee chaahie
shiksha mein parivartan aur sudhaar kee raashtreey-antararaashtreey goshthiyon mein anek baar poora paridrshy chaar prashnon mein baantakar vishleshit kiya jaata hai-kise padhaen, kya padhaen, kaise padhaen aur kaun padhae? pahale prashn mein bachche ko jaanana, samajhaana, usakee ruchiyon, manovigyaan ityaadi sammilit hoga. doosara hoga ki kya aur kitana use sikhaana hai yaanee vishayavastu aur poora paathyakram. teesara mahatvapoorn avayav hai vidha. isamen shikshan vidhiyaan, sanchaar takaneek ke upayog shaamil honge. chautha hoga ki vah vyakti kaun aur kaisa hoga jo padhaane ke lie upayukt ho aur usake saath hee adhikrt bhee ho. is vyakti kee pahachaan gurukul ke guru se praarambh hokar maastar saahab tak pahunchee aur aaj sanvida adhyaapak, atithi adhyaapak, shiksha mitr jaise sambodhanon mein simat gaee hai. jaise gurukul kee sankalpana bina guru ke nahin ho sakatee. vaise hee kya skool bina adhyaapakon ke kaheen bhee chal sakata hai? bhaarat mein bina adhyaapakon ke bhee skool chalate hain. agast 2016 mein sansad ko bataaya gaya ki desh mein 105630 ekal adhyaapak vaale skool hain. kuchh din pahale hee lokasabha mein yah jaanakaaree bhee dee gaee ki sarakaaree skoolon mein adhyaapakon ke 10,14,491 pad rikt hain. aise mein desh ke 30-35 hajaar skoolon mein adhyaapakon ka kisee bhee din skool mein na hona saamaany ghatana hee maanee jaegee. praarambhik skoolon mein 17.5 pheesad aur maadhyamik skoolon mein 14.9 pheesad pad khaalee hain. in saare padon par niyukti ka adhikaar keval raajy sarakaaron ke adhikaar kshetr mein hee aata hai. kendr isamen kuchh nahin kar sakata hai, vah samay-samay par aarthik sahaayata deta rahata hai. vaise kendreey vishvavidyaalayon mein bhee saal bhar pahale tak 16,600 pad rikt the. aise aankade pichhale kaee varsho se desh ke saamane aate rahe hain. un par charcha bhee hotee rahatee hai. 1har baar har star par aashvaasan die jaate hain ki rikt shikshakon kee niyuktiyaan sheeghr hee pooree kar dee jaengee, magar nateeja vahee dhaak ke teen paat rahata hai. isake peechhe ke kaaran bhee sabhee ko gyaat hain. ve log jo sudhaar la sakane kee sthiti mein hain, sarakaaree skoolon kee sthitiyon se prabhaavit nahin hote. unake bachchon ke lie naamee-giraamee nijee skool upalabdh hain. ve samay-samay par shiksha kee gunavatta mein ho rahee giraavat par chinta avashy prakat karate rahate hain. vishv ke sau ya do sau uchch shiksha sansthaanon aur vishvavidyaalayon mein bhaarat kee anupasthiti par bhee chinta prakat kee jaatee hai. nae-nae upaay bhee sujhae jaate hain aur unamen se kuchh ka kriyaanvayan bhee praarambh kiya jaata hai, lekin parivartan dikhaee nahin deta hai. shiksha kee gunavatta kee dhuree ‘kaun padhae’ ke aasapaas hee ghoomatee hai. dekha jae to isaka kendr bindu gaanv ka sarakaaree skool hee nikalega. jab vahaan adhyaapak hee nahin honge tab gunavatta kahaan se aaegee aur kaise aaegee? prabandhan ke aaiaiem jaise sansthaanon ke hote hue bhee ham adhyaapakon kee niyuktiyaan karane mein kyon asamarth hain? kya isaka kaaran vyavastha kee isamen ruchi na lena hee hai? adhyaapakon kee taiyaaree kee or dhyaan dena keval shiksha dene ke lie hee aavashyak nahin hai. isake anek paksh aise hain jo jaane-anajaane jeevan ke har kshetr mein prabhaav daalate hain. shikshak prashikshan sansthaanon mein yadi prashikshak apane kartavy ka pooree tarah paalan karata hai to har prashikshu usaka avalokan karata hai aur vaisa hee banane kee or agrasar karata hai. jab prashikshu apane prashn bina hichak prashikshak se poochh sakata hai tabhee usakee pratibha jaagrat hotee hai. vah skoolon mein jaakar bhee is khule vaartaalaap ke mahatv ko aadhaar banaakar apana kaary karata hai. bhaarateey sanskrti aur sabhyata ke parichaayak anek granthon mein guru aur aachaary ke sambandh mein bahut kuchh aisa likha gaya hai jo sada hee sveekaary aur anukaraneey bana rahega. any anek apekshaon ke saath vah udaar, sanyamee aur sthir chitt vaala ho, gyaan evan aadhyaatm ke lie sada vyaakul rahanevaala ho. hamaare shikshak prashikshak sansthaanon ko un granthon ka adhyayan kar aur unaka sam-saamayik sandarbh mein vivechan kar saar-tatv nikaal kar prashikshaarthiyon ko upalabdh karaana chaahie. pandit vidyaanivaas mishr ke shabdon mein- ‘aachaary shabd ka bada vishad arth hai: aachaary vah hai jo keval svayan aacharan nahin karata, balki jo aacharan karaata hai, keval aacharan karane se aachaary nahin hoga. jo aacharan kare aur doosaron se aacharan karae, svayan padhe, doosaron se padhae, svayan taiyaaree kare aur doosaron se taiyaaree karae vah aachaary hai.’ ek samay naalanda, takshashila, vikramashila jaise gyaan kendron mein saath se adhik deshon ke gyaanaarthee aakar apanee gyaan pipaasa shaant karate the aur maanaveey gyaan bhandaar ko aur paripusht karane mein apana yogadaan karate the. svaamee vivekaanand ne sachche adhyaapak ke lie kaha tha-‘sachche aachaary vahee hain jo apane shishy kee pravrti ke anusaar apanee saaree shaktika prayog kar sakate hain. sachchee sahaanubhooti ke bina ham kabhee bhee theek-theek shiksha nahin de sakate. guru ke saath hamaara sambandh theek vaisa hee hai jaisa poorvaj ke saath vanshaj ka.. jin desho mein is prakaar ke guru-shishy sambandh kee upeksha huee hai.. vahaan guru ka matalab rahata hai apanee dakshina se aur shishy ka matalab rahata hai guru ke shabdon se. isake baad donon apana-apana raasta naapate hain.’ aaj bhaarat mein bhee adhikaansh shaikshik sansthaon mein isee prakaar kee sthiti ban gaee hai ya banatee ja rahee hai. aaj khuleaam shiksha udyog par neetiyaan banatee hain, goshthiyaan hotee hain aur laabhaansh kamaane ke nae raaste talaashe jaate hain. aise mein adhyaapakon ke prashikshan mein in pravrtiyon ka parichay karaana aavashyak hai. desh ko aise adhyaapak chaahie jo pahale desh kee gyaanaarjan parampara se parichay praapt karen aur vishv star par jo ghatit ho raha hai use jaanen. phir donon ke beech jitana aavashyak aur upayogee ho usamen samanvay sthaapit karen. isake lie shikshakon ke seva-poorv evan sevaakaaleen prashikshan ke sansthaan yogyatam vyaktiyon dvaara sanchaalit hon,
shreshthatam aachaary vahaan kaary karen aur samaaj evan sarakaaren unhen sabhee prakaar ke aavashyak sansaadhan tatha svaayattata upalabdh karaen. shiksha sudhaaron mein is samay sabase adhik praathamikata ka kshetr shikshak prashikshan sansthaanon ko jeevant aur sakriy banaakar ek anukaraneey kaaryasanskrti ko pun: sthaapit karana hee hai.
0 comments
Post a Comment